آنا؟ آني؟ ناي؟ نايا؟

أيّا عسلامتكم و مرحبا بيكم
أكثر حاجة نعمل عليها جوّ في قعدة تلمّ مواطنينا بالخارج كيف نبداو نتعاندو شكون يعرف أكثر عبارات تونسيّة ما يفهموهاش لُـخْرِينَا و بالطّبيعة شكون ألفاظو المحلّية تعبّر خير على وضعيّة ما. تلقانا نفركسو على أصل و فصل كلّ كلمة. هاو سبنيول، هاو تركي، هاو طلياني، كيف ما نلقاوها لا سوري لا المشتقّ الخمسة و عشرين من كلمة بالعربي تظهرلنا شلحة. وغادي نوحلو و نولّيوْ نبَهْبْرُو على بعضنا شكونو البريمة إلّي باش يجيب قاموس ـ بالعربي دِكْسْيُـونِـيرْ ـ تونسي/ شلحة. هههههههههه
الحاصيلو، هاو بعض الكلمات و المصطلحات. موضوع يتبع بطبيعة الحال  و إلّي عندو ما يزيد يتفضّل

العتبة  ــ  تُتْوار
البْهار  ــ  الشّعر (إلّي يْدَرّقو بيه باب الدّار)
يدرّق  ــ  يغطّي  ــ يخبّي
الوسطّية  ــ  وسط الدّار
الـمَتْلَا  ــ  الجّرّاية  ــ المضربة (بالعربيّة)
الدّاڤرة  ــ الصّحفة (إلّي تاكل فيها اللبلابي)
فمّا شكون  “يشَعّل” و شكون “يِشعِل” الضّو مثلا
فمّا إلّي شعرو مْسَبسَب و إلّي شعرو مْسَرسَب
هاك العام  نحكي مع جاري تونسي ـ نسيت منين بالضّبط ـ  عملّي عركة كيفاش كيفاش نقلّو “إِنتِ” و هوّ ذكر موش أنثى لكن عادي جدّا عندو كيف يقول “يدّين ” وقت إلّي يحكي على يد وحدة
فمّا إلّي يموت فيسع و إلّي يموت بالعجلة
و إلّي ڤَدّادة يمشي و يْجي و إلّي فيسع يقضي شورو
و هذا فْصَع و هذا فْصَك و الآخر بصّ في اللّوزة و ساقيه للرّيح
و إلّي ما يفرّقش بين ساقو و رجلو و قدمو و كراعو
و إلّي يفَحَّج باش يذِبْ السّاقية
بعد العبانة جات الفرشيّة و في جرّتها الكوبيرتة
البُوسطة عند الطّلاين ظرف
و إنت آش تقول؟ دبّوسة و إلاّ دبّوزة ماء؟
و في حومتكم عندكم ياسر صُجرات و إلاّ برشا شِجرات؟

الحاصيلو يظهرلي يزّي المرّة هاذي و كيما قلتلكم تفضّلو زيدو و صلّحو كان لزم

نهاركم طيّب